"Paano yun, babae siya?"
"Babae ka lang, hindi mo kaya."
"Ang babae, mahina."
"Delikado, kasi babae siya."
Mga pahayag na nagbabalatkayo
Mga salitang nakatago sa imahe ng malasakit
Mga bitaw na nagbabagong anyo
Mga kaisipang nagpapalabo
Sa mga matang nang mamaliit
Panghuhusga'y namumutawi
Pananaw na nababahiran ng galit
Dahil sa babaeng nakasasabay sa nakararami?
Hindi sukatan ang kasarian
Upang malaman ang papel sa lipunan
Hindi dapat iyon ang tinitingnan
Sapagkat kakayahan ang siyang magiging batayan
Daang taon na ang lumipas
Kakayahan ng kababaihan ay naipamamalas
Hindi kailanman hinayaang matapakan
Ang kababaihan may puwang sa kinabukasan
Patuloy na magpapakitang gilas
Ng kakaibang sikap at lakas
Sa mga pagsubok na mula sa kanyang lipunan
Babae lang ang siyang hindi matatawaran
Comments