Laya

“Alam mo ba kung ano ang tunay na kalayaan?”

Tanong ng isang boses na nangibabaw sa dilim

“Ang kalayaan para sa akin ay ang manatili rito”

Sagot nya sa sariling katanungan

“Ngunit kung mananatili ka rito,

Hindi ba’t isa ka lamang bilanggo?

Paano kang naging malaya,

Kung nakagapos naman ang iyong kamay at paa?”

Sa aking pagsambit ng mga katagang iyon

Halakhak lamang ang kanyang naging tugon

Habang ako’y nanatiling naguguluhan

Kung paano ito naging kalayaan

“Ako’y nakagagalaw, nakapagsasalita,

Walang tinatapakan at ginagawang masama

Alam ang responsibilidad sa bawat gawa

Hindi ba’t ito ay pagiging malaya?”

“Kung ang hangad mo’y kalayaan

Mula sa sakit, sa kamatayan

O maging sa sarili mong kapalaran

Ito’y hindi tunay at isang huwad lamang”

Sa aking pagninilay, doon ko naintindihan

Na nasa ating isipan kung ano ang tunay nitong kahulugan

Hindi ang kung ano ang tinanim ng lipunan

Na ito’y pagiging malaya sa lahat ng aspeto ng buhay

Doon unti-unting nawala ang piring sa aking mga mata

Nakita ang mga ngiting nagmumula sa kanila

Habang sumasayaw sa saliw ng musika

Mga nilalang na laya sa ilusyong ideolohiya

Photograph by: Mark Quirante